شارع بيتنا القديم
انا فاكر وصفته
ع الناصيه فكهانى
وناصب فرشته
وفـ ساعه العصارى
ينادى على فاكهته
ينادى بصوت جميل
ياحلاوه غنوته
وعـ اناصيه التانيه كشك
وصاحبه عجلاتى
يقوم الفجر يصلى
ودا طبع فيه يوماتى
انا فاكر لسه اسمه
بالوشم على ايده راسمه
وكان اسمه عم حمزه
وكنا لسه تلامذه
وف اخر الشارع
كانت هناك مدرستى
انا فاكر اسمها
مكتوب على كراستى
وكنت اصحى الصبح بدرى
فرحان بمريلتى
وف ايدى شنطه قماش
صنعاها ام احمد جارتى
وعلى ناصيه المدرسه
واحد بعربيه
كان اسمه عم حسن
بتاع التمريه
انا برضه لسه فاكره
كان بعمه وجلابيه
وف شارع مدرستنا
كنا نرسم ع الارض صوره
ونلم عيال حارتنا
ونلعب ماتش كوره
وكان فيه بنت جارتى
انا فاكر شكلها
بضفيره وبلوزه بمبى
واسمى على اسمها
لما العب ماتش كوره
تشاورلى اشاورلها
كنا لسه صغيرين
وسنى من سنها
ويخساره الفرحه ماتمت
وساعتها الناس اتلمت
على زماره الخطر
وبدانا ف التهجير
والناس زعلانه كتير
على فراق بعضها
ويعدى سنين وسنين
وانا كلى شوق وحنين
لشارع بيتنا القديم
اللى على ناصيته فكهانى
وكشك عم حمزه
وبتاع التمريه
لله بجد جميله فكرتني بأيام مش جميله
وذكرى حزينه
بس جوانا واللي خلي
مرارة ايامها تزول نصر فاتح
دراعاته لقلب انكسر
وفي يوم بات مهزوم
ربت علي ظهر الثكالي
والأرامل واليتامي
غسل قلوبهم الحزانه
يوم مشق الساتر بعزم وجراءه
وانهي كدبه اننا مش قدالعبور
كان هناك علي الخط مرابط
وحوش أسود ونمور
وفي السما طاير أغلي نسور
..بس مازلت ملامحي زى ماهي
زى مابيتنا القديم رغم الركام
اللي سببه الدمار
شامخ عموده منكس
واقف يقول تعظيم سلام
ولسه في عيوني جارتي
وعم حمزه والفكهاني
ومدرستي اللي أسمها
مكتوب علي كراستي
